Pluijm akataa Mabadiliko

                                                                   
KOCHA Mkuu wa Yanga, Hans Van Pluijm ameomba Shirikisho la Soka Tanzania (TFF) kufanya mabadiliko kwa kuongeza idadi ya usajili wa wachezaji wa kigeni kutoka 7 mpaka 10 kwenye timu zinazoshiriki Ligi Kuu.
Pluijm alisema hayo kufuatia kufanya vibaya kwa timu hiyo kwenye hatua ya makundi ya michuano ya Kombe la Shirikisho Afrika ambapo ilikubali kipigo cha mabao 3-1 kutoka kwa Medeama ya Ghana katikati ya wiki hii.
Kwenye mahojiano maalumu na gazeti hili kwa njia ya mtandao jana Pluijm alisema kwamba anahitaji kuijenga upya Yanga kwa ajili ya mashindano ya Ligi ya Mabingwa Afrika msimu ujao na aina ya wachezaji.
“Idadi ya wachezaji 10 wa kigeni ni muhimu kwa soka la Tanzania na hasa kwa Yanga kwa sababu itashiriki mashindano ya Ligi ya Mabingwa Afrika msimu ujao. Kama ikiwezekana idadi iongezwe nipate nafasi ya kutengeneza upya kikosi cha ushindi,” alisema Pluijm.
“Tatizo langu ni pa kuwapata wachezaji wanaoweza kuimarisha Yanga. Hawapatikani katika ligi ya nyumbani.
Akizungumzia zaidi mchezo huo dhidi ya Madeama Pluijm aliwatupia lawama mabeki wakongwe wa timu hiyo Nadir Haroub ‘Cannavaro’ na Kelvin Yondani kwa kufanya makosa yaliyoigharimu timu hiyo kwenye mechi hiyo.
“Kila mmoja alisema ana furaha kuona Cannavaro akirejea kwenye kikosi cha kwanza kwenye mechi hiyo. Lakini sasa kila mmoja aliona alivyocheza. Nimehuzunishwa pia na kiwango cha Kelvin Yondani pia kwenye mechi hii,” alisema Pluijm.
Suala la idadi ya wachezaji wa Ligi Kuu imekuwa ikibadilika mara kwa mara, miaka ya nyuma klabu ziliruhusiwa kusajili wachezaji watatu, baadaye ikaongezeka mpaka kufikia kusajili wachezaji watano lakini watatu ndio wanaruhusiwa kucheza kwenye mechi moja.
Msimu uliopita TFF iliruhusu usajili wa wachezaji saba wa kigeni na watano ndio wanaruhusiwa kucheza mechi moja. Baadhi ya klabu za Ligi Kuu Azam, Yanga na Simba ziliomba kuruhusiwa kusajili wachezaji 10 wa Ligi Kuu jambo ambalo halijapatiwa jibu na TFF.

Share And Comment Bellow On What You Think About This Post!!!